Azərbaycanda biruşaqlı ailələrdə boşanma halları təxminən 71 faiz, iki və daha çox uşağı olan ailələrdə boşanma halları 38 faiz artıb.

1990-cı ildə ölkədə 14 040 boşanma halı qeydə alındığı halda, 1995-ci ildə bu rəqəm 2 dəfədən çox azalaraq 5 669-a enib. 2017-ci ildə isə boşananların sayı yenidən 14 514-ə çatıb ki, bu da 1990-2017-ci illər ərzində qeydə alınan ən yüksək göstəricidir. 2018-ci ilin yalnız yanvar-oktyabr aylarında (2018-ci il üzrə yekun hesabat açıqlanmayıb) qeydə alınmış boşanma hallarının sayı 12 396 təşkil edib.

Ümumilikdə boşananlar arasında uşaqsız ailələr çoxluq təşkil edir. Lakin göstəricilərdən aydın olur ki, ötən illərdə uşağı olmayan ailələrdə boşanma halları nisbətən azalsa da, uşaqlı ailələr arasında boşanmaların sayı çoxalıb.

1990-cı illə müqayisədə 2017-ci ildə, yəni 27 il ərzində (2018-ci il istisna olmaqla) bir uşağı olan ailələrdə boşanma halları 70,95 faiz, 2 və daha çox uşağı olan ailələrdə boşanma halları 38,25 faiz artıb.

1990-cı ildə boşananların 8 853 nəfəri uşağı olmayan, 2 045-i bir uşağı olan, 3 142-i iki və daha çox uşağı olanlar olduğu halda, 2017-ci ildə boşananların 6 444 nəfəri uşağı olmayan, 3 946 nəfəri bir uşağı olan, 4 124 nəfəri iki və daha çox uşağı olan şəxslər olub.

Uşağı olmayan ailələr arasında ən çox boşanma halı 1990-cı ildə, uşaqlı ailələr arasında ən yüksək boşanma göstəricisi isə 2017-ci ildə qeydə alınıb.

2017-ci illdə boşanma nəticəsində valideynlərin biri ilə qalmış uşaqların sayı 13 110 olub ki, bu da hər 100 boşanmaya 162 uşağın düşməsi deməkdir.

Ümumilikdə götürdükdə, boşanmalar daha çox şəhər yerlərinin payına düşsə də, kənd yerlərində əhalinin hər 1000 nəfərinə düşən boşanmaların sayı artıb, şəhər yerlərində isə əksinə, azalıb.

1990-cı ildə şəhər yerlərində əhalinin hər 1000 nəfərinə düşən boşanmaların sayı 3,5 olduğu halda, 2017-ci ildə bu göstərici 1,9-a enib. Kənd yerlərində isə 1990-cı ildə 0,2 olan boşanma göstəricisi 2017-ci ildə 1-ə çatıb.

2017-ci ildə boşanma halları ən çox 30-34 (3 568) 30-34 yaşlı kişilər, 25-29 yaşlı qadınlar (3 803) arasında baş verib.

Qeyd edək ki, Ədliyyə Nazirliyinin Vətəndaşlıq vəziyyəti aktlarının reyestri xidmətinin rəisi Reyhanə Kərimova Trend-ə Azərbaycanda ailələrin ən çox xarakter uyğunsuzluğu, sonsuzluq və kənar müdaxilələr səbəbindən dağıldığını söyləyib.

Ötən ilin dekabr ayında istifadəyə verilən “Babək” prospektinin bir hissəsində çökmə baş verib.

Azərbaycan Avtomobil Yolları Dövlət Agentliyinin (AAYDA) mətbuat xidmətinin rəhbəri Anar Nəcəfli Modern.az-a hadisə ilə bağlı açıqlama verib.

O bildirib ki, çökmə 2-3 metrlik hissədə baş verib:

“Hazırda əməkdaşlarımız ərazidədir. Deformasiyaya uğramış hissə bərpa olunur. Problemin hansı səbəbdən yarandığı araşdırılır”.

AAYDA rəsmisinin sözlərinə görə, çökməyə ilkin səbəb kimi yolun altından yenidənqurma zamanı çoxlu yeni kommunikasiya xətləri çəkilməsi ehtimal olunur.

Xatırladaq ki, Prezident İlham Əliyevin sərəncamı ilə “Babək” prospektinin yenidənqurma işlərinə 2018-ci ilin dövlət büdcəsindən 20,1 milyon manat vəsait ayrılmışdı.

Qeyd edək ki, yenidənqurma işləri zamanı yeraltı kommunikasiya xətlərinin çəkilişi digər qurumlarla birgə aparılıb, prospekt boyunca 4 km-ə yeni yaxın kanalizasiya kollektoru, 1000 və 800 mm diametrli polad borularla 7 km uzunluğunda əsas magistral, prospektin sağ və sol hissəsi ilə polietilen borularla 11 km uzunluğunda paylayıcı kəmərlər olmaqla, ümumilikdə 30 km-ə yaxın su xətti çəkilib.

Bundan başqa aparılan yenidənqurma zamanı səth sularının yolun hərəkət hissəsindən kənarlaşdırılması üçün mövcud yağış-kanalizasiya sistemi də bərpa olunub, zəruri olan yerlərdə yeni sistem qurulub.

Yanvarın 18-dən 19-na keçən gecə hava bir qədər ayaz olacaq. Bu səbəbdən dağlıq ərazilərdə yağıntılar kəsilsə də, havanın hərarəti daha da enəcək.

Bunu Ekologiya və Təbii Sərvətlər Nazirliyi Hidrometeorologiya Departamentinin direktoru Umayra Tağıyeva bildirib.

Onun sözlərinə görə, yanvarın 18-dən sonra növbəti iki-üç gün ərzində ölkə ərazisində hava şəraitinin sabitləşəcəyi və mülayimləşəcəyi gözlənilir.

“19-21 yanvar aralığında havanın hərarəti tədricən iqlim normasına yaxınlaşacaq və mülayim küləklər əsəcək. Xəzər dənizində isə yüksək dalğa yanvarın 18-də gün ərzində davam edəcək. Dəniz akvatoriyasında xəbərdarlıq öz qüvvəsində qalacaq”.

Ötən ilin dekabr ayında yol polisləri üçün ölkəyə gətirilən son model xidməti avtomobillər artıq istifadəyə verilib. Dünyada ilk dəfə Avstriyada yol polisinə verilən bu cür avtomobillər ikinci partiya olaraq Azərbaycana gətirilib. Yeni gətirilən “Mersedes” markalı avtomobillər yol polislərinin bu günə qədər istifadə etdiyi avtomobillərdən bir çox yeni xüsusiyyətlərinə görə fərqlənir.

Hələlik ölkəyə gətirilən 118 ədəd avtomobilin hamısında yeni ”İ-Patrul” sistemi quraşdırılıb.

Yol Patrul Xidməti avtomobilinin dayandığı, eləcə də hərəkət etdiyi hallarda fasiləsiz qaydada fəaliyyət göstərmək imkanına malik olan sistem ətrafı 360 dərəcə əhatə edən 9 videonəzarət kamerası ilə təchiz olunub. Sistemin daxilində qarşıdakı beş zolaqda hərəkət edən nəqliyyat vasitələrinin dövlət qeydiyyat nişanlarını və sürətlərini avtomatik rejimdə qeydə alan “Radar” quraşdırılıb.

Xeberlenti.com xəbər verir ki, yeni avtomobillərin digər özəllikləri barədə  Axar.az -a danışan nəqliyyat eksperti Elməddin Muradlı bildirib ki, bu avtomobillərdə yan istiqamətlərdə ”Nömrətanıma” və GPS modulu da var. Həmçinin sistemin dayanıqlı daxili kompüter qurğusu bütün proseslərin avtomatlaşdırılmış rejimdə aparılmasına imkan verir.

Ekspert bildirib ki, Yol Patrul Xidmətinin yeni avtomobillərində xüsusi cihaz var ki, avtomobilə perpendikulyar istiqamətdə sağ və sol tərəflərdə dayanmış nəqliyyat vasitələrinin də nömrə nişanlarını oxuya bilir. Bu sistem həmçinin nömrəsi və sürəti oxunmuş nəqliyyat vasitələri barədə məlumatları mərkəzi serverdə də arxivləşdirir:

“Məsələn, beş avtomobil yanaşı gedir və bunlardan beşi də sürət həddini aşıb. Əvvəlki sistem bu avtomobillərdən ancaq birini aşkarlaya bilirdi. Yeni gətirilən avtomobillərə quraşdırılan xüsusi sistem həmin avtomobillərin beşini də aşkarlayıb sürücü barəsində inzibati protokol tərtib edə bilir”.

E.Muradlının sözlərinə görə, yeni patrul avtomobilləri oğurluq və ya qaçırılmış avtomobilləri də tez bir zamanda aşkar edir:

“Məsələn, “Niva” markalı avtomobilin nömrəsi “Mersedes” markalı avtomobilə quraşdırılıbsa, polisin yeni avtomobilindəki sistem vasitəsilə onu aşkar etmək mümkündür. Yəni, həmin avtomobil polis avtomobilinin qarşısından keçən zaman bunu müəyyən edəcəklər.

Bundan başqa, sözügedən avtomobillər gecə vaxtı 30 metr məsafədən görünməyən infro-qırmızı işıqlar vasitəsilə digər avtomobillərin nömrələrini oxuya bilir. Görüntünü aydınlaşdırmaq üçün özündən işıq saçır. Bütün bunlar qayda pozan sürücülərin, axtarışda olan nəqliyyat vasitələrinin aşkarlanmasında çox böyük rol oynayacaq”.

Yeni gətirilən avtomobillərin qiymətinə gəlincə, bu, avtomobilin modelinə əsasən dəyişir. Ekspert bildirib ki, qiymətə avtomobilə quraşdırılmış xüsusi avadanlıqlar da təsir edir.

Belə ki, “Mersedes” C-300 modelinin Azərbaycanda satış qiyməti 98 min manatdır. E-450 modelinin qiyməti isə modelin növündən asılı olaraq 120 min manatdan başlayır.

Eyni markanın E-350 və C-43 modelinin qiymətləri isə 100 min manatdan bahadır.

Xatırladaq ki, qiymətlər modellərin özünə aiddir. Bura YPX avtomobillərinə quraşdırılmış xüsusi qurğuların qiyməti daxil deyil.

Qeyd edək ki, ötən ilin 26 dekabr tarixində ölkəyə yol polisi əməkdaşları üçün yeni avtomobillər gətirildi. Avtomobillər 27 dekabr tarixində Prezident İlham Əliyev Polis Akademiyasının yeni tədris binasının açılışında iştirak edərkən təqdim olunub.

Yeni ilin ilk günlərindən etibarən isə avtomobillər mərhələli şəkildə polislərə verilir.